(NTB-Maria Möhring-Marius Helge Larsen-NPK): Sjølv om avgiftskutta på diesel og bensin ikkje blir vidareførte, trur statsminister Jonas Gahr Støre (Ap) at det er utsikter til meir moderate prisar framover.

– No har prisane på olje, som leier til prisane på pumpa, komme mykje ned. Men vi må jo følgje med på dette. Det kan vere utsikter til at prisane no kan halde seg på eit meir moderat nivå, seier Støre til NTB.

– Då får vi prisar som er omtrent på nivå med, eller kanskje litt under, det vi har vore vande med, seier han.

Denne veka blussa debatten om drivstoffavgiftene opp igjen, og Senterpartiet trua med å gå til høgresida dersom dei ikkje fekk med seg dei raudgrøne partia på å forlengje dei mellombelse avgiftskutta etter 1. september.

Forheld seg til Stortinget

Torsdag og fredag gjekk likevel mykje av lufta ut av ballongen, då det vart klart at det så langt verken er fleirtal blant dei raudgrøne partia eller blant dei borgarlege for å føre vidare kutta.

– Regjeringa har forhalde seg til Stortingets vedtak. I mars stemde Arbeidarpartiet imot dette, men fleirtalet i Stortinget stemde for kutt i desse avgiftene som skulle gjelde til 1. september, seier Støre.

– Og det fleirtalet har eg inntrykk av at står. Det er ikkje fleirtal for å endre det. Då forheld vi oss til Stortinget, seier han.

Noregspris og mat

Statsministeren er ikkje overraska over at budsjettpartnaren Senterpartiet på nytt var med å blåse liv i drivstoffdebatten saman med Framstegspartiet.

– Dette er jo kjende standpunkt frå Senterpartiet, seier han.

Støre viser til at regjeringa har gjort fleire andre tiltak for å redusere levekostnadene til folk i haust, mellom anna vidareføring av noregspris.

– Og så skal vi også følgje veldig nøye med på matprisane, og halde kjedene ansvarlege for å ha konkurranse, sånn at dei prisane ikkje stig meir enn andre prisar, seier han.

(©NPK)