(NPK-NTB-Mette Bjørberg Estep): Ei ny straumpriskrise vil komme dersom regjeringa ikkje grip inn, meiner Raudt og Frp. Energiminister Terje Aasland (Ap) forsikrar at det framleis er rikeleg tilgang på rein og rimeleg straum i alle delar av landet.

Dei siste tala frå Noregs vassdrags- og energidirektorat (NVE) viser at fyllingsgrada i norske vassmagasin i Sør-Noreg er på det lågaste nivået på over 20 år. Låg fyllingsgrad betyr at det er mindre vatn til kraftproduksjon og kan bidra til at kraftprisane blir høgare enn dei elles ville ha vore.

– Noreg står overfor den mest alvorlege kraftsituasjonen sidan 2022. Vassmagasina i Sør-Noreg er på rekordlåge nivå, samtidig som krafteksporten har vore høg dei siste månadene. I tillegg ser vi teikn til at Europa igjen går mot rekordlåge gasslager. Bordet er dermed dekt for ei ny straumpriskrise, skriv Bjørnar Moxnes i Raudt til NTB.

Også Frps stortingsrepresentant Kristoffer Sivertsen reagerer kraftig på tala.

– Det er heilt vilt at Noreg eksporterer store mengder straum samtidig som vi tappar allereie låge vassmagasin. Vi må sikre nok kraft til norske hushald, industri og forsvar før vi sender ho ut av landet, seier han.

Varslar tiltak

Energiministeren avviser begge to.

– No er det på høg tid at Raudt og Frp pustar med magen og sluttar å skremme folk.

– Vi har nok kraft i Noreg. Sør-Noreg har mange store vassmagasin og eit overskot av kraft. Sjølv om fyllingsgrada er lågare enn normalt, er det framleis mykje vatn i magasina. Det er også heilt vanleg at fyllingsgrada varierer gjennom året og mellom ulike år, seier Aasland.

Regjeringa vil elles presentere fleire tiltak for raskare utbygging av kraft og straumnett.

– Etterspurnaden etter kraft og nett har auka kraftig dei siste åra, men utbyggingstempoet har ikkje halde tritt med utviklinga. Derfor er det behov for å forenkle regelverk og kutte byråkrati, skriv regjeringa i ei pressemelding torsdag.

Krev sikring av arbeidslivet

I utspelet sitt krev Frp at regjeringa “får på plass eit ansvarleg minstenivå for vassfyllingsgrada i norske vassmagasin”.

– Regjeringa kan ikkje gamble med kraftforsyninga til norsk næringsliv. Norske arbeidsplassar må prioriterast framfor auka eksport, seier Sivertsen, som meiner konsekvensen av å ikkje ta grep kan bli konkursar og tap av arbeidsplassar.

Raudt er også oppteken av at regjeringa må sikre nok vatn i magasina før vinteren og “hindre endå eit straumprissjokk når kulda kjem”.

Medan hushald som har valt noregspris har eit vern der, meiner Moxnes store delar av næringslivet framleis er eksponerte for høge straumprisar.

Aasland forsikrar at alt Ap gjer i energipolitikken, handlar om å sikre låge og konkurransedyktige straumprisar.

– Det handlar om å byggje ut meir nett, meir kraftproduksjon og ei vidare satsing på energieffektivisering. Det er også viktig at næringslivet og bedrifter kan få føreseielege straumkostnader. Ap-regjeringa har innført ei ordning for fastprisavtalar på straum, som mange bedrifter har nytta seg av.

Ikkje stor krafteksport

Aasland går i rette med dei som hevdar Noreg aukar eksporten av straum på kostnad av norske forbrukarar.

– Kraftutvekslinga går begge vegar. Det er feil at det har vore stor krafteksport i år. Tvert imot er nettoeksporten av straum 75 prosent lågare så langt i år enn i fjor, og i periodar har vi importert straum frå nabolanda våre.

Aasland lovar at straumprisane skal ned mot normale nivå. Han legg til at Ap-regjeringa har innført nye reglar som gjer at dei kan gripe inn i disponeringa av vassmagasina dersom det skulle bli nødvendig:

NVE vurderer på fagleg og sakleg vis om det er reell fare for knappleik på energi, og kan ved behov gripe inn i magasindisponeringa. Det kan også fastsetjast avgrensingar på utanlandssambanda.

– Vi er ikkje i ein slik situasjon no, seier Aasland.

(©NPK)