(NPK-NTB-Reuters): Alle land må bidra til å isolera Iran, krev USA, som truar med amerikansk maktbruk mot dei som ikkje gjer slik president Donald Trump krev.

Finansminister Scott Bessent varsla måndag kveld norsk tid sanksjonar mot 60 selskap til som ifølgje USA bidreg til å halda den iranske økonomien flytande.

Samtidig trua han med amerikanske straffetiltak mot land som ikkje bidreg til å isolera Iran, men utan å gå i detalj eller oppgi nokon tidsfrist.

– Alle former for økonomisk samarbeid med Iran vil utsetja dei ansvarlege for rekkevidda til amerikansk makt, sa Bessent.

– Vi har ikkje uavgrensa tolmod, la han til.

– Økonomisk apokalypse

– Sjølv om Trump-administrasjonen har omtalt tiltaka som starten på ein økonomisk apokalypse for Iran, er det uklart om USA i praksis kan gjera så mykje meir for å ramma den iranske økonomien, skriv The New York Times.

Trump innførte allereie under sin første presidentperiode ein kampanje for å leggja «maksimalt press» på Iran, og tidlegare i år skjerpa han sanksjonane. Kva følgjer dei nye amerikanske straffetiltaka vil få, er derfor heilt uvisst, påpeikar storavisa.

«IRAN KOLLAPSAR FULLSTENDIG», skreiv Trump på Truth Social måndag.

Vil ramma Kina

Kjelder i Det kvite huset har tidlegare ymta frampå om moglegheita for å innføra sanksjonar mot land som handlar med Iran, men USA går førebels ikkje så langt.

Dette vil i så fall først og fremst ramma Kina, som er den største kjøparen av iransk olje.

Trump-administrasjonen har frå før innført sanksjonar mot uavhengige kinesiske raffineri som kjøper iransk olje, men har ikkje innført sanksjonar mot dei kinesiske finansinstitusjonane som legg til rette for slike transaksjonar.

Nye tiltak som rammar Kina, kan komplisera møtet Trump skal ha med Kinas president Xi Jinping neste månad, skriv The New York Times.

Bessent understreka måndag at ingen land bør kjenna seg for trygge.

– Ingen, heller ikkje Kina, er utanfor rekkevidda av amerikanske sanksjonar, sa han.

– Gjentek berre

Iranske talspersonar blæs av dei amerikanske straffetiltaka.

– Trump-administrasjonen «gjentek berre metodar som har vist seg å vera mislykka», sa talsperson for det iranske utanriksdepartementet Esmaeil Baghaei måndag.

Han åtvara samtidig andre land mot å slutta opp om dei amerikanske sanksjonane.

Irans viseutanriksminister Kazem Gharibabadi fnyser også av dei amerikanske straffetiltaka.

– Først seier dei at den militære slagkrafta til Iran er avvikla, at fabrikkane er knuste, og at atomprogrammet er gravlagt. Dernest seier dei at det er nødvendig med ein historisk økonomisk invasjon, der alle institusjonane i USA skal vera med. Er dette ein siger eller ei innrømming av USAs nederlag? spør han på meldingstenesta X.

(©NPK)