(NPK–NTB): Ukrainas utanriksminister Andrij Sybiha trur den diplomatiske aktiviteten for å skapa fred i Ukraina kjem til å auka framover.

– Eg trur at me no kjem til å få ein ny dynamikk i fredsinnsatsen, ved at det igjen blir ein aktiv fase med politisk og diplomatisk innsats i mange av verdas hovudstader, seier han til pressa i Kyiv torsdag.

Tidlegare torsdag sa Russlands president Vladimir Putin at det finst ei moglegheit for å få på plass ein fredsavtale.

– Takksemd

– Me er takksame for alle som prøver å bidra til ein avtale. Er det ei moglegheit? Etter mi meining, ja, sa Putin då han var med på Eastern Economic Forum (EEF) i Vladivostok aust i Russland.

Ifølgje Putin er USA og Kina blant fleire land som ønskjer å støtta ein fredsavtale.

Men han seier også at Ukrainas varsel til FNs luftfartsorganisasjon (ICAO) og dessutan ukrainske angrep på skipstrafikk, gjer det vanskelegare å starta nye forhandlingar.

Ukraina varsla onsdag ICAO om at russisk luftrom ikkje er trygt for sivil luftfart og bad om at det blir forbode for passasjerfly å bruka det. Den siste tida har både Russland og Ukraina trappa opp angrepa langt inne på kvarandres territorium.

India vil bidra

Torsdag var utanriksministeren i India Subrahmanyam Jaishankar på besøk i Kyiv.

Her heldt han ein felles pressekonferanse med Sybiha og sa at India er klar til å bidra med å få slutt på krigen.

For få dagar sidan sa Indias statsminister Narendra Modi det same under toppmøtet i Shanghai Cooperation Organisation (SCO).

Her hadde Modi eit eige møte med Putin. Det same hadde Kinas president Xi Jinping.

(©NPK)