(NPK-NTB) Ein mann vart skoten i brystet i Tønsberg natt til torsdag. Tilstanden vart beskriven som alvorleg, men stabil, ifølgje politiet. Ingen er pågripne i saka.

Mannen ringde sjølv til AMK natt til torsdag og opplyste at han var skoten i brystet. Han vart deretter send til traumemottaket ved Sjukehuset i Vestfold.

Operasjonsleiar Ståle Fuglaas i Sør-aust politidistrikt opplyste til NTB natt til torsdag at den fornærma hadde vorte flogen med luftambulanse til Ullevål sjukehus.

Til Tønsbergs Blad opplyste operasjonsleiaren i morgontimane at politiet ikkje er bekymra for at hendinga vidare vil utgjere nokon fare for allmenta.

Kjenning av politiet

Det er snakk om ein person i 30-åra, som politiet omtaler som ein kjenning.

– Han høyrer heime i Tønsberg-distriktet, opplyser politiadvokat Ann Iren Svane Mathiassen til avisa.

Mathiassen opplyste torsdag formiddag at mannen framleis er innlagd på sjukehus.

– Førebels har vi ikkje noko meir å seie om hendingsgangen, vi har ikkje fått avhøyrt fornærma, seier Mathiassen til NTB.

Ingen mistenkte

Politiet har framleis ingen mistenkte i saka.

– Vi jobbar breitt med teoriar og hypotesar, som at det kan vere ein ukjend gjerningsmann eller at det kan vere sjølvpåført, seier politiadvokaten.

Politiet har opplyst at det er for tidleg å seie kva slags våpen som er brukt.

– Vi må etterforske om den er påført av andre, sjølvpåført eller om det har vore eit uhell. Vi held alle moglegheiter opne, avsluttar ho.

I 15.30-tida melde politiet at dei kriminaltekniske undersøkingane er avslutta og at åstaden er frigitt.

(©NPK)