(NPK-NTB-AFP-Reuters): Sju menneske er drepne og fleire andre er skadde i ei skuleskyting nord for den thailandske hovudstaden Bangkok.

Både lærarar og elevar er blant dei drepne i skuleskytinga i Nonthaburi-provinsen fredag, opplyser talsmann for politiet i Thailand, Trairong Phiwphan.

Politiet opplyser også at gjerningsmannen, som var elev på skulen, drap besteforeldra sine i heimen deira før han opna eld på skulen.

Mannen avfyrte 26 kuler på skulen, og det vart funne 34 kuler til på åstaden.

Ifølgje politiet er den antekne gjerningsmannen frakta til sjukehus etter å ha prøvd å ta sitt eige liv.

Phiwphan seier at 15 menneske vart skadde. Ein talsmann for innanriksdepartementet seier at dei vart skadde då dei prøvde å flykte, ikkje i sjølve skytinga.

Politiet seier at det var ein elev som opna eld på Debsirin Nonthaburi-skulen i distriktet Bang Kruai i Nonthaburi i utkanten av Bangkok.

Augnevitne fortel at elevar strøymde ut av skulen då skytinga byrja, medan lærarar omfamna kvarandre og gret.

Skytinga er den andre skyteepisoden på ein skule i Thailand i år. I februar vart ein lærar drepen og ein elev såra på ein skule sør i landet.

(©NPK)