(NPK-NTB-Maria Möhring) Ein velferdssjekk på ei privat adresse i 18-tida tysdag enda med at ein person forskansa seg med våpen i eit hus på Dyrøy i Troms.

Politiet er i kontakt med personen, men har førebels ikkje lykkast med å få vedkommande ut av huset.

– Hendinga har dessverre trekt ut i tid, noko som forståeleg nok påverkar lokalbefolkninga, skriv politiet i ei pressemelding torsdag ettermiddag.

Politiet rykte ut for å gjennomføre ein velferdssjekk klokka 18 tysdag, men trekte seg tilbake etter å ha vorte trua med det som vart oppfatta som eit våpen.

Naboane i området vart evakuerte, og fylkesveg 7842 er stengd for all annan trafikk enn utrykkingskøyretøy.

I 1-tida natt til onsdag avfyrte personen eit skot mot politiet frå bustaden.

– Vi har hatt kontakt og ein dialog. Per no ligg det ikkje føre noka løysing på situasjonen, men vi jobbar med saka, sa operasjonsleiar Eirik Kileng til Nordlys torsdag morgon.

– Politiet beklagar dei ulempene dette medfører, men vurderer det som nødvendig å halde oppe vegsperringane i området inntil situasjonen er avklart, heiter det vidare i pressemeldinga.

– Dette er ein krevjande situasjon som krev tolmod frå politiets side.

Politiet har sagt at dei vil bli på staden til situasjonen er løyst og under kontroll. Dei har fått hjelp frå Oslo politidistrikt, men har ikkje sagt noko om kva bistanden består i.

Dyrøy kommune har sett krisestab som følgje av hendinga.

(©NPK)