(NTB-NPK): Det er påvist krepsepest i delar av Drammensvassdraget. Strenge tiltak er sette i verk for å få bukt med spreiinga.

Tidlegare i månaden vart det meldt om døde krepsar i Drammenselva, og Veterinærinstituttet kunne seinare konstatere at dei døde krepsane var smitta av krepsepest.

Det vart då innført eit forbod mot å krepse i området, og torsdag vart det fastsett ei restriksjonssone som omfattar kommunane Modum, Krødsherad, Drammen, Lier, Ringerike, Jevnaker, Hole, Øvre Eiker og Sigdal i Buskerud og Akershus.

Det finst store bestandar av edelkreps i kommunane. Fisket skulle etter planen starte 10. august.

Sjukdommen blir forårsaka av eggsporesoppen Aphanomyces astaci, som kan spreie seg både oppover og nedover i vassdrag.

Soppen blir spreidd til andre vassdrag via flytting av fisk eller kreps, eller når fiskeutstyr blir brukt i andre vassdrag utan å ha vorte desinfisert først.

Krepsepest kan ikkje smitte til menneske eller andre dyr, opplyser Mattilsynet.

(©NPK)