(NTB-AFP): Minst 100 menneske omkom i eit jordskred ved ei ulovleg gullgruve i Den sentralafrikanske republikken, melder AFP.

Leiteaksjonar går framleis føre seg etter at raset gjekk tysdag ettermiddag ved gruveområdet Zamboye, nær grensa til Kamerun.

Redningsmannskap og lokale innbyggjarar har så langt henta ut 30 lik frå den samanrasa gruva, seier Soulemayne Bi, varaordførar i Nana-Mambere-prefekturet, ifølgje Al Jazeera.

Gruveulykker er vanlege i Den sentralafrikanske republikken, der fleire tusen menneske arbeider med småskala gruvedrift utanfor statleg kontroll. Arbeidet er risikabelt fordi gruvearbeidarane vanlegvis ikkje har tilstrekkeleg med vern, og ulykker er ofte dødelege.

I juni omkom titals menneske i eit ras ved Be-Mbari-gruva, også den ved grensa til Kamerun.

(©NPK)