(AP-NTB-NPK): FN og klimaforskarar åtvarar om at eit stadig sterkare El Niño-fenomen vil utløyse ekstremvêr over heile verda langt inn i 2027.

Eit område i Stillehavet som blir brukt til å måle styrken til El Niño, har denne veka nådd sitt varmaste og mest intense nivå nokosinne for den 15. veka sidan fenomenet oppstod, melder forskarar ved Columbia University.

FNs generalsekretær António Guterres åtvara fredag om at vêrfenomenet El Niño vil forsterke klimakrisa dramatisk.

– For to månader sidan åtvara eg om at El Niño stod på dørstokken vår. No er det inne i huset – og skrur opp varmen, sa Guterres.

– Ukjent farvatn

– Vi er allereie inne i ein sommar med ekstremvêr – rekordvarm hete, apokalyptiske skogbrannar i Spania, Frankrike og langt utover. Men ifølgje den nyaste forskinga er dette berre eit forvarsel, la han til.

– Vi er i ukjent farvatn. Klimakrisa er på høggir, sa Guterres.

FNs meteorologiorganisasjon (WMO) åtvarar om at El Niño sannsynlegvis vil utløyse ekstrem hete, tørke og nedbør langt inn i neste år, og at fenomenet er venta å vare til våren 2027.

Sør-Europa i brann

Store delar av Sør-Europa har i sommar slite med enorme skogbrannar, der særleg Frankrike og Spania er verst ramma. På det meste var 330.000 menneske evakuerte.

Europa er no inne i ein alvorleg tørke, med mellom anna tørre elveleie, vassrestriksjonar og øydeleggjande skogbrannar i ei rekkje land. Mykje av kontinentet fekk mindre regn enn normalt denne våren, men det var den klimadrivne varmen som gjorde tørken meir alvorleg, seier Mariam Zachariah ved Imperial College i London, som er medforfattar i studien World Weather Attribution.

Menneskeskapte klimaendringar har ført til meir intens tørke i Europa, og ekstremvarme er drivaren bak dei knusktørre forholda, ikkje lite nedbør, seier ei gruppe forskarar.

(©NPK)