(NTB-NPK): Fellesforbundets forhandlingsleiar seier partane har hatt kontakt etter at ein mogleg SAS-streik vart varsla, og at dei møtest hos Riksmeklaren torsdag.

– No i ettermiddag har det vore kontakt med motpart og riksmeklaren, og vi er samde om å møtast hos Riksmeklaren førstkommande torsdag, sa forhandlingsleiar Dag-Einar Sivertsen i Fellesforbundet under ein pressekonferanse måndag.

I uravstemminga som vart avslutta 30. juli, stemde eit stort fleirtal i Fellesforbundet nei til den framforhandla tariffavtalen for kabintilsette i SAS.

500 kabintilsette kan streike

Også Parats medlemmer har stemt nei.

Forbundet har bede om umiddelbare samtalar med SAS og NHO Luftfart for å unngå streik.

Det er varsla flystreik blant om lag 500 kabintilsette i SAS frå laurdag 8. august klokka 4.

Ingen kansellerte flygingar endå

Førebels har ikkje flyselskapet kansellert eller endra nokre avgangar, melder Nettavisa.

– Det er altfor tidleg å forskotere noko rundt ein mogleg konflikt, seier kommunikasjonssjef Øystein Schmidt i SAS i ei melding til avisa.

SAS vil no prøve å finne ei løysing før streiken trer i kraft.

– Fokuset vårt no er vidare dialog slik at vi kan komme fram til ei god løysing for begge partar, seier Schmidt.

(©NPK)