Nyheitsbyrået har snakka med fleire anonyme kjelder som har band til Kreml.
Ifølgje kjeldene har Russland konkludert med at forhandlingane om ein fredsavtale har hamna i ei blindgate og vurderer no å trappa opp angrepa mot Ukraina.
Russland planlegg i første omgang å intensivera dei ballistiske missilangrepa mot Kyiv og dessutan mot infrastrukturmål i andre ukrainske byar.
– Nato-angrep
Kreml betraktar i aukande grad dei ukrainske angrepa mot mål i Russland som angrep frå Nato-land ettersom desse landa forsyner Kyiv med våpen og etterretning, seier Bloomberg-kjeldene.
Utsendingane til president Donald Trump, Steve Witkoff og Jared Kushner, har ikkje besøkt Moskva på åtte månader.
Det er venta at USA snart vil gjera eit nytt forsøk på å føra partane til forhandlingsbordet, men Moskva trur ikkje på noko gjennombrot, seier kjeldene.
Putin varsla
Ifølgje to av Bloomberg-kjeldene meiner Kreml at dei alt har komme med innrømmingar som har gjort sitt til å svekkja Russlands posisjon i krigen.
President Vladimir Putin signaliserte ei kommande opptrapping i ein kommentar til ein russisk journalist i helga, der han slo fast at vestlege sanksjonar ikkje vil få Russland til å gi etter.
– Det var Ukraina som opna denne pandoraeska. Vel, ver førebudd på ein motreaksjon retta mot dei mest sårbare delane av økonomien dykkar, sa han.
(©NPK)
0 kommentarer