(NPK–NTB): Dei aller fleste av NHOs medlemsbedrifter ser framleis pessimistisk på det neste halvåret. Berre hos Offshore Norge og Fornybar Norge rår optimismen.

Det viser NHOs ferskaste medlemsundersøking, der 2714 bedrifter har svart på spørsmål om deira syn på den noverande næringslivssituasjonen og utsiktene dei neste seks månadene.

Resultata viser at utsiktene blant norske bedrifter var tilnærma uendra frå august til september, og at pessimismen framleis rår i dei fleste bransjar og fylke.

Kraftbransjen ser lyst på framtida

Energibransjen er så godt som den einaste der optimisme rår. Fornybar Norge og Offshore Norge er dei einaste av NHOs 15 landsforeiningar der fleirtalet oppgir å sjå lyst på det neste halvåret.

Hos NHO Logistikk og Transport er det også ei viss betring i framtidstrua.

Hos Abelia – NHOs landsforeining for kunnskaps- og teknologiverksemder, har derimot framtidsutsiktene forverra seg mest.

Størst svekking i sjømatnæringa

Sjømat Norge har den største svekkinga i den sokalla «nosituasjonen», nemleg korleis bransjen meiner ting står til akkurat no. Dette sjølv om august var ein rekordmånad for norsk lakseeksport, med «historisk høg verdi for sjømateksporten», ifølgje direktør Christian Chramer i Noregs sjømatråd.

Samla sett er nosituasjonen noko svekt på tvers av alle NHOs medlemsbedrifter. 20 prosent vurderer situasjonen som god, medan 23 prosent vurderer den som dårleg. I august var det ingen skilnad.

Utsiktene er negative i alle fylke, men vurderinga av nosituasjonen sprikjer noko. Situasjonen blir vurdert som sterkast på Vestlandet og svakast på Austlandet og i Trøndelag.

Undersøkinga vart gjennomført mellom 25. august og 3. september.

(©NPK)