(NPK–NTB): Skodespelaren George Clooney, ein sjølverklært demokrat, seier USA blir styrt av dei minst kvalifiserte menneska i landet.

– Eg trur kanskje vi har eit kakistokrati no, men vi kjem til å komme oss gjennom det, seier han.

Omgrepet «kakistokrati» blir brukt om eit land som er styrt av dei verste, minst kvalifiserte og mest skruppellause innbyggjarane.

Clooney er for tida i Venezia for å vere med på filmfestivalen, som opna onsdag. Der skal han få Æres-Gulløven.

På ein pressekonferanse trekte han parallellar til andre mørke tider i USA i si levetid og meiner at tida under president Donald Trump kan samanliknast med USA på 60-talet.

– Eg er gammal nok til å ha vore gjennom 1968 i USA då alle byar stod i brann, og vi mista Martin Luther King og Robert Kennedy i løpet av same år, seier han.

– Det var masse vald. Kongressbygningen var omringa av stridsvogner.

Men han er framleis optimist. Mellomvalet i november kan gi litt meir balanse, og i 2028 kan ein kanskje finne tilbake til ein slags normalitet, ifølgje Clooney.

Clooney samla pengar til Joe Bidens kampanje i 2024 og har innverknad hos Demokratane. Då Biden omsider trappa ned under valkampen, skjedde det kort tid etter at Clooney var blant dei første til å ta til orde for det.

(©NPK)