(NPK-NTB): Statsministeren i Nepal, Kinas statlege kringkastar og fleire amerikanske ekspertar knyter flaumkatastrofen i Himalaya til klimaendringane.

– Det er på tide å kraftfullt ta opp med verdssamfunnet katastrofane som me opplever som følgje av klimaendringane, skreiv statsminister Balendra Shah i ei melding om flaumen i sosiale medium måndag kveld.

Same dag melde Kinas statlege kringkastar CCTV at flaumen «vart forårsaka av isbre-ustabilitet» knytt til «dei langsiktige effektane av global oppvarming».

Flaumkatastrofen hende onsdag førre veke, då enorme vassmassar rasa nedover dalføre ved grensa mellom Nepal og kinesisk-kontrollerte Tibet. Styrtflaumen kom av store mengder is og stein som rasa ned i elveløp då ein isbre kollapsa høgt oppe i fjella. Det er mistenkt at grunnen kan ha svikta under breen.

Også fleire ekspertar som den amerikanske kringkastaren NPR) har snakka med, meiner dei gradvis stigande temperaturane hadde noko å seia for det som skjedde.

– Det er ingen tvil om at denne hendinga var meir sannsynleg på grunn av klimaendringane, seier Twila Moon ved National Snow and Ice Data Center ved University of Colorado.

Ifølgje forskar Alton Byers, som jobbar ved same universitet, er permafrosten i bakken i Himalaya i endring fordi det blir varmare. Grunnen blir mjukare og kan lettare gå i oppløysing, ifølgje Byers.

(©NPK)