(NPK-NTB-AFP-Reuters): Ei rekkje statsleiarar, som alle ønskjer meir innverknad på kostnad av USA, møttest måndag til toppmøte i Kirgisistan.

Blant deltakarane på det to dagar lange møtet er Russlands president Vladimir Putin, Kinas president Xi Jinping, Indias statsminister Narendra Modi og Irans president Masoud Pezeshkian.

Møtet blir halde i regi av Shanghai-samarbeidsorganisasjonen (SCO), som vart stifta i 2001, og som har ti asiatiske og sentralasiatiske medlemsland, og dessutan enkelte land som har status som dialogpartnarar, som Tyrkia.

Xi og Putin hadde måndag eit eige møte der dei mellom anna diskuterte Ukraina-krigen, men temaet opptok ikkje mykje tid, ifølgje Kremls talsperson Dmitrij Peskov. Andre saker var viktigare, påpeika han. Dei to møttest sist i mai.

Denne gongen fastslo Xi at «usikkerheita og uføreseielegheita har auka», medan Putin insisterte på at «samarbeidet utviklar seg med hell på alle frontar».

Putin og Modi hadde også eit eige møte. Her insisterte Modi på at India støttar alle forsøk på å få slutt på krigen i Ukraina.

Iran-krigen er også blant temaa, og presidenten i Iran hadde måndag eigne møte med fleire andre leiarar, mellom anna Putin og Modi.

Pezeshkian gjentok bodskapen om at Iran ønskjer ein avtale med USA slik at krigen kan ta slutt.

– Å halde fram krigen er verken i interessa vår eller i interessa til nokon andre i regionen, sa han då han møtte Modi.

(©NPK)