Det er omtrent like mange som dagen før, men litt færre enn gjennomsnittet på 15 skip dei siste ti dagane, viser førebelse data frå Kpler, som driv ei teneste for sporing av skip og analyse av skipstrafikken.
To av skipa frakta flytande naturgass, medan eit anna frakta bitumen, eit restprodukt som blir danna ved raffinering av råolje, i tillegg til to tomme tankskip.
Talet kan endrast ettersom enkelte skip slår av posisjonssendarane sine undervegs.
Før USA og Israel gjekk til angrepskrig mot Iran 28. februar, vart om lag ein femdel av olja i verda og flytande gass frakta sjøvegen gjennom det viktige sundet.
Sidan skipstrafikken framleis er nærast ikkje-eksisterande, blir dei globale oljemarknadene ramma hardt.
Navigasjonskorridor
Iran og Oman har diskutert ein mellombels navigasjonskorridor for gjennomfart og dessutan ein felles plan for minerydding i Hormuzsundet. Frå Teheran er beskjeden framleis at sundet ikkje blir opna før USA avsluttar krigen.
Ingen militære fartøy vil få passere sundet, og iranske styresmakter vil halde fram med å overvake alle kommersielle skip som ønskjer å segle gjennom det, seier Irans viseutanriksminister Kazem Gharibabadi.
– Vi stengde Hormuzsundet før USA innførte ein økonomisk blokade fordi USA ikkje oppfylte forpliktingane sine i samsvar med intensjonsavtalen, seier Gharibabadi ifølgje det statlege nyheitsbyrået Irna.
USA og Iran inngjekk 17. juni ein 60 dagar lang mellombels avtale som inkluderte ei forlenging av ei våpenkvile frå 8. april. Avtalen gjekk ut førre veke.
Oppfylle alle forpliktingar
– Før det blir sett i verk tiltak for å gjenopne Hormuzsundet, må USA fullt ut oppfylle alle dei forpliktingane dei har brote, seier Gharibabadi og oppmodar USA til å avslutte krigen, oppheve blokaden av iranske hamner og løyse situasjonen i Jemen.
Jemen er det siste landet som vart trekt inn i konflikten då den Iran-støtta houthimilitsen braut ei våpenkvile frå 2022 med regjeringa i nabolandet Saudi-Arabia.
Han avviste fullstendig president Trumps utsegner om at alle sjøminer er heilt fjerna eller detonerte i internasjonalt farvatn i Hormuzsundet.
«Økonomisk kveling»
USAs finansminister Scott Bessent kunngjorde måndag nye sanksjonar mot 60 selskap til som ifølgje USA bidreg til å halde iransk økonomi flytande.
Målet er å tvinge Iran til overgiving gjennom «økonomisk kveling». Bessent trua samtidig land som ikkje bidreg til å isolere Iran, med amerikanske straffetiltak.
– La det ikkje vere nokon tvil om USAs standpunkt. Alle former for økonomisk samhandel med dette mordariske regimet vil utsetje dei ansvarlege for den fulle rekkevidda av amerikansk makt, sa Bessent og la til at Trump no ringer andre leiarar for å gjere dette klart.
Irans svar på sanksjonane er angrep på USAs økonomiske interesser, seier Gharibabadi.
(©NPK)
0 kommentarer