(NPK-NTB-Kenneth Kandolf Haug): Opp mot ti skilt om fare for elg er sporlaust forsvunne i Målselv kommune. Viltnemnda mistenkjer at allierte Nato-soldatar har teke med seg ein liten suvenir.

– Det er klart at det er ein hypotese, men vi veit at det er i det tidsrommet at skilta vart borte, seier nestleiar Tor Eriksen i Målselv viltnemnd til NRK.

Det er langs fylkesvegnettet i Målselv kommune i Midt-Troms at skilta har forsvunne. Både NRK og Troms Folkeblad, som hadde saka først, melder at det kan vera snakk om opptil ti skilt. Og mistanken fell altså på Nato-soldatar som var i området under øvinga Cold Response i vår.

– Men korleis dei eventuelt har fått desse minna med seg i bagasjen, kan ein jo berre spekulera på, seier Eriksen til lokalavisa.

Ofte er det turistar som tek med seg skilta med fare for elg. Eriksen understrekar at det er viktig at skilta står der dei står for trafikktryggleiken sin del. No håpar han at dei får sett på plass nye skilt så fort som råd før haustmørket senkar seg.

(©NPK)