(NPK-NTB-Reuters-AP): Det israelske militæret (IDF) set i gang etterforsking av soldatar for drapa på 15 hjelpearbeidarar på Gazastripa i 2025 og drapa på den fem år gamle palestinske jenta Hind Rajab og familien hennar i 2024.

Femåringen har vorte eit internasjonalt symbol på barns sårbarheit i krigsområde. Den siste telefonsamtalen mellom henne og nødsentralen dannar basis for dokumentarfilmen «Hind Rajab – stemmen fra Gaza», som vart Oscar-nominert.

Samtidig opplyser IDF at dei ikkje har funne skilleg grunn til mistanke om straffbare forhold i samband med drapa på sju World Central Kitchen-tilsette i 2024.

Avgjerdene, som vart kjende onsdag, kjem etter undersøkingar gjennomførte av IDFs eige granskingsorgan.

– I meir enn tusen dagar har IDF drive intensiv krigføring på ei rekke frontar og utført eit breitt spekter av militære oppdrag i ein usedvanleg krevjande operasjonell røyndom, heiter det i ei fråsegn.

– Som ein del av IDFs forpliktingar under folkeretten og israelsk lov, undersøkjer IDF uvanlege hendingar som har oppstått under kampane, heiter det vidare.

(©NPK)