(NPK-NTB-Iuliana Alexa): Det er 81 år sidan atomangrepet i Hiroshima. Tre av fire nordmenn meiner atomvåpen bør vere forbodne, ein nedgang samanlikna med åra før, viser ei undersøking.

– Dette er oppmuntrande tal i den usikre situasjonen vi er i globalt. Det betyr at folket ønskjer seg at Noreg tek ei modigare rolle internasjonalt for å få eliminert desse forferdelege masseøydeleggingsvåpna, seier generalsekretær Raymond Johansen i Norsk Folkehjelp.

Undersøkinga, der 1051 vart spurt, er utført av Respons Analyse på oppdrag frå Norsk Folkehjelp.

– Akkurat no er atomvåpen med ei sprengkraft 135 000 Hiroshima-bomber tilgjengelege for bruk. Det talet bør skremme oss alle, seier Johansen.

Delte meiningar om fransk samarbeid

Undersøkinga viser eit vedhaldande klart fleirtal for at Noreg bør ha ein atomvåpenfri forsvars- og tryggingspolitikk. Samtidig aukar delen som svarer nei – frå 21 prosent i 2025 til 22 prosent i 2026.

Atomvåpensamarbeidet med Frankrike skaper uvisse i befolkninga: 28 prosent oppgir at dei vil kjenne seg tryggare med eit slikt samarbeid, medan 20 prosent svarer at dei vil kjenne seg utrygge. Ein stor del (42 prosent) svarer at dei er usikre.

– Ein stor del er usikre på eit atomvåpensamarbeid med Frankrike. Det speglar det vi i Norsk Folkehjelp har påpeika tidlegare, at avgjerda om samarbeidet med Frankrike vart teken for raskt og utan tilstrekkeleg offentleg debatt, seier Johansen.

Skepsis til utplassering i Noreg

I undersøkinga svarer kvar fjerde nordmann (25 prosent) at det er rett å ha atomvåpen utplassert i Noreg i ein krisesituasjon. Nær halvparten (46 prosent) er likevel imot dette.

Temaet ser ut til å vere vanskeleg for mange – heile 28 prosent oppgir at dei ikkje veit kva dei skal meine.

Mesteparten av Hiroshima vart øydelagd 6. august 1945, då USA i sluttfasen av andre verdskrigen sleppte ei atombombe over byen, ifølgje Store norske leksikon.

Tre dagar seinare vart ei endå kraftigare atombombe sleppt over Nagasaki, skriv NDLA.

Minst 200.000 menneske døydde i Hiroshima, rundt 100.000 av dei var militære og resten sivile. I Nagasaki døydde om lag 140.000 menneske.

(©NPK)