Tydal Data Center i Trøndelag opplyser at dei har inngått ein avtale om å levere datakraft til eit «ledende amerikansk AI-laboratorium».

Kontrakten har ein verdi på 45 milliardar kroner over ein periode på 16 år, ifølgje selskapet.

– Ved ferdigstilling er Tydal venta å vere Noregs største operative KI-datasenter og blant Europas største KI-datasenter, drive av 100 prosent fornybar vasskraft, skriv Tydal Data Center i ei pressemelding.

Dei er eit dotterselskap av det Singapore-registrerte krypto og KI-selskapet Bitdeer, som er registrert på Nasdaq-børsen i New York.

Sjølve avtalen blir inngått mellom Bitdeer og Volta Infrastructure. Volta er eit selskap som utviklar, finansierer, byggjer og driftar KI-fabrikkar.

– Voltas kunde ved anlegget blir eit leiande amerikansk AI-laboratorium, medan Dell Technologies leverer den teknologiske infrastrukturen, heiter det i pressemeldinga.

Ferdig i 2027

Anlegget i Tydal vil levere 121 MW KI-reknekapasitet, støtta av 133 MW total effekt. Det blir bygd for Nvidias neste generasjon AI-plattform, Vera Rubin, opplyser selskapet.

– Bitdeer utviklar datasenteret trinnvis. Første byggjefase er planlagd sett i drift ved utgangen av 2026, medan andre byggjefase er planlagd ferdigstilt i første kvartal 2027, opplyser selskapet.

Tydal Data Center har i dag rundt 50 tilsette. Etter kvart som det nye datasenteret blir bygd ut, forventar dei å ha 100 arbeidsplassar knytte til anlegget.

– Vi byggjer infrastruktur som vil vere avgjerande for framtidas kunstige intelligens. Dei neste tiåra vil tilgang til KI-regnekraft bli like viktig som tilgang til elektrisitet og breiband. Noreg har alle føresetnader for å ta ei leiande rolle i Europa, og Tydal blir ein av stadene der denne framtida blir bygd, seier Haakon Bryhni, styreleiar i Tydal Data Center, i pressemeldinga.

– Skal komme heile samfunnet til gode

I fleire år har datasenteret i Tydal drive med utvinning av bitcoin.

I sommar opplyste likevel styreleiaren til Adresseavisen at dei hadde kasta ut datamaskinene som vart brukte til dette, og at dei var i gang med ombygginga til eit datasenter for kunstig intelligens.

– Verdiskapinga skal komme heile lokalsamfunnet til gode, seier Bryhni.

Bitdeer beskriv avtalen som ein milepæl:

– Bitdeer har vore til stades i Noreg sidan 2018, og vi er stolte over å bidra til etableringa av AI-datasenter i stor skala i Noreg og Europa. Saman med Volta, Dell Technologies, JPMorgan, Goldman Sachs og dei andre samarbeidspartnarane våre byggjer vi eit av Noregs største AI-datasenter, drivne berre av karbonfri energi, seier grunnleggjar, styreleiar og administrerande direktør Jihan Wu i Bitdeer, i pressemeldinga.

(©NPK)