Avvæpninga gjeld Hamas og alle andre væpna grupper i Gaza, skriv Trump på Truth Social.
– Dette er eit monumentalt steg mot varig fred og tryggleik, skriv Trump.
Hamas stadfestar overfor AFP at komiteen som er sett ned av Trumps såkalla fredsråd for å styre Gaza mellombels, skal ha tilsyn med lagringa av Hamas’ våpen.
Det er eit viktig steg for at Gaza skal bli styrt av nye palestinske styresmakter, seier Trump.
– Samtidig får Israel tryggleiken dei fortener når Gaza ikkje lenger blir brukt som ein base for terrorangrep, skriv den amerikanske presidenten.
Trump: Israel skal trekkje seg ut
Avvæpning av Hamas har vore ei av dei vanskelegaste utfordringane i 20-punktsplanen for fred, som la grunnlaget for våpenkvila mellom Israel og Hamas. Avvæpninga skal skje i fleire fasar som er nøye utforma, ifølgje Trump.
– Når avvæpninga er over, skal israelske styrkar trekkje seg ut, skriv Trump.
Ei gradvis uttrekking av israelske styrkar er også ein del av avtalen, stadfestar ikkje-namngitte Hamas-kjelder som blir omtalte som høgtståande tenestepersonar, overfor AFP. Vidare ventar dei at det såkalla fredsrådet sørgjer for at Israel overheld vilkåra i avtalen.
Israel har førebels ikkje kommentert avtalen. Ei amerikansk kjelde, som blir omtalt som ein høgtståande tenesteperson, seier til Reuters at Israel er skeptiske til om Hamas faktisk kjem til å la seg avvæpne.
Varslar møte
Israel blir ikkje bedne om å gå med på noko som ikkje har vore del av den tidlegare planen, og USA er svært trygge på at Israel kjem til å føye seg, ifølgje Reuters-kjelda. Om dei ikkje gjer det, vil Trump bli svært skuffa, ifølgje kjelda.
Trumps fredsråd stadfestar i ei melding på X at Hamas har gått med på ein detaljert plan for å gjennomføre dei neste fasane i fredsplanen.
Overtakinga til styringskomiteen byrjar snart, støtta av ein stabiliseringsstyrke, ifølgje meldinga.
Eit møte mellom meklarlanda skal finne stad i Kairo i løpet av kort tid, ifølgje det statstilknytte egyptiske mediet Al-Qahera News. Opplysningane er referert av nyheitsbyrået AFP. I tillegg til Egypt utgjer Qatar, Tyrkia og USA meklarlanda.
Under møtet skal neste fase av fredsplanen diskuterast, ifølgje Al-Qahera. Nokon dato for møtet er ikkje oppgitt.
Angrep held fram
Hamas varsla nyleg at dei løyser opp si de facto regjering i Gaza og overlèt ansvaret til styringskomiteen som er oppretta.
I helga melde komiteen med palestinske teknokratar, som i samsvar med Trumps plan skal overta styringa i Gaza, at dei ikkje tek over styringa før israelske styrkar er trekte ut. Dei siste ni månadene sidan våpenkvila vart innførte, har komiteen sete i Egypt.
Israel okkuperer no nærare 70 prosent av Gazastripa og har bygd ein enorm jordvoll mot dei vestlege områda der enklavens rundt 2,2 millionar innbyggjarar er trengde saman.
Trass i våpenkvila held Israels fram angrep i Gaza. Så seint som torsdag vart fire personar drepne, blant dei to barn, i eit israelsk luftangrep. Rundt 1200 palestinarar er drepne sidan våpenkvila tredde i kraft.
(©NPK)
0 kommentarer