(NPK-NTB): Valstyremakta i Sverige nedjusterer talet på førehandsrøyster som er ramma av feil, frå 4000 til 500.

500 førehandsrøyster har blitt ramma av ein teknisk feil i forkant av valet på søndag. Det melder svenske TV4 måndag.

Førre veke oppgav valstyremakta i Sverige at det dreidde seg om rundt 4000 røyster, men etter «intensivt analysearbeid» senkar dei no talet til 500.

– Det talet kan komme til å søkke. Dette er sjølvsagt svært alvorleg og skal ikkje kunne skje, seier kontorsjef hos Valmyndigheten Anna Nyqvist.

Dei uidentifiserte veljarane tilhøyrer ei gruppe der røystene feilaktig har fått ein annan veljar sitt manntalsnummer og dermed er feilregistrerte. Det kjem av at røystemottakaren har begynt å ta imot ei ny røyst utan å avslutte røystemottaket for førre vel.

Ei anna årsak til at røyster er feilregistrerte, er at personar har førehandsrøysta meir enn éin gong, noko som gjer at alle førehandsrøystene frå desse blir underkjende.

– Vi kjem ikkje til å kunne kontakte ramma veljarar ettersom vi ikkje veit kven dei er. Vi ber derfor om tolmod fram til vi kan gi meir informasjon om kva lokale og kva tidspunkt som blir omfatta, seier Nyqvist i ei pressemelding.

Valstyremaktene har kalla inn partisekretærane i riksdagspartia til møte måndag for å gi informasjon om dei feilregistrerte røystene.

(©NPK)