(NPK-NTB): Så langt i år har 83 personar mista livet i trafikken. Halvparten av dødsulykkene skjedde i sommar.

– Det viser kvifor vi omtaler årstida som høgsesong for trafikkulykker. Fleire er på tur enn elles i året, og folk køyrer generelt fortare om sommaren. Høg fart aukar risikoen for at det skjer ulykker, seier Tanja Loftsgarden, fagdirektør i Trygg Trafikk.

34 menn og 7 kvinner har mista livet på norske vegar i sommar.

Trygg Trafikks tal viser at det førekom dødsulykker i trafikken i alle fylka i landet i sommar. Dette har ikkje skjedd på ti år.

Flest dødsulykker skjedde i Akershus og Vestland fylke, der det døydde seks personar i begge. I Innlandet mista fem personar livet i trafikken i sommar.

I perioden juni-august har 14 MC-førarar mista livet. Det er ein nedgang frå 16 i same periode i fjor.

– Vi er særleg bekymra for MC-førarane, som har så lite vern når noko går gale – og i år ser vi også at ein større del av dei som omkom på MC, er unge førarar i alderen 16 til 24 år, seier avdelingsdirektør for trafikksikkerheit Guro Ranes i Statens vegvesen.

(©NPK)