(NPK-NTB): Over tusen migrantar i havsnød er i løpet av den siste veka redda utanfor kysten av Vest-Afrika, opplyser Leger uten grenser.

Migrantane la ut frå Gambia i sju båtar med kurs for Kanariøyane. Organisasjonen karakteriserer dette som den lengste migrasjonsruta i verda.

Blant migrantane var det 134 kvinner og 88 mindreårige barn. Det langt største talet på fleire båtar er unge menn som håpar å nå Europa via Kanariøyane, som er ein del av Spania.

Den norske avdelinga av Leger uten grenser seier at migrantane blei trua av menneskesmuglarar og utsette for vald og overgrep. Ei kvinne har fortalt om valdtekt.

– Når menneske legg ut på ei 2000 kilometer lang reise, som akkurat no er den mest dødelege i verda, er det klart at dei reiser frå noko som er mykje verre, seier Dalil Adij, leiaren for arbeidet til organisasjonen i Vest-Afrika.

Dei fleste av migrantane kjem frå Senegal og Gambia, medan andre kjem frå Mali, Guinea og Elfenbeinskysten. Dei fekk akutt legehjelp frå Leger uten grenser og andre organisasjonar.

– Menneska vi hjelper, fortel ofte at dei tek denne ruta for å flykte frå vald og ekstreme forhold i heimlandet. Men på vegen blir dei utsette for meir vald og fleire overgrep, seier Adij.

Migrantane blei sende til Nouadhibou i Mauritania og byane Rosso og Dakar i Senegal.

(©NPK)