(NPK-NTB): Finland har sett opp eit 200 kilometer langt gjerde langs grensa mot Russland.

Gjerdet vart innvigd måndag av Finlands innanriksminister Mari Rantanen ved grensestasjonen i Nuijamaa søraust i landet.

Finland grunngir bygginga med at det er eit viktig tiltak for å verne landet mot russiske påverknadskampanjar der Moskva sender migrantar til grensa.

– Dette er ein del av grensekontrollen vår og hjelper oss med overvaking, men også med å halde folk borte frå finsk territorium om det blir nødvendig, seier Rantanen.

Gjerdet dekkjer likevel berre ein del av den 1300 kilometer lange grensa.

I desember 2023 stengde Finland grensa mot Russland etter at hundrevis av migrantar hadde kryssa grensa mellom landa – noko Finland betrakta som eit russisk forsøk på eit hybridangrep.

Finlands landsgrenseovergangar mot Russland vil halde fram med å vere stengt «inntil vidare».

(©NPK)