(NPK-NTB-Anna Nesje): Dei to dronningane går hand i hand etter båra, medan kong Haakon og kronprinsesse Ingrid Alexandra går saman først. Prosesjonen med båra til kong Harald går gjennom dei vakre salane på Slottet.

Den same rituelle ferda gjekk føre seg med far hans, kong Olav, i 1991. Den gongen var det ingen TV-kamera til stades, men no blir prosesjonen send direkte.

Båra blir ført av barna og barnebarna til kong Harald, dronning Mette-Marit og dronning Sonja. Sonen til Mette-Marit, Marius Borg Høiby, er også med. Han har fått løyve til å forlate Skaugum, der han for tida oppheld seg i varetekt med fotlenke.

Båra har stått i Den raude salongen sidan ho vart bringa dit frå Rikshospitalet fredag kveld, same dag som kong Harald døydde.

Frå sal til sal

Prosesjonen bevegar seg høgtideleg gjennom Slottet: Først gjennom Den gule salongen, deretter Speilsalen, Dagleg matsal, Lille festsal og Store festsal.

Det er hoffsjef Olav Heian-Engdal som leiar heile prosesjonen. Han ber kongekrona på ei pute, medan leiaren for Det kongelege sekretariatet ber rikssverdet. Alle dei tilsette ved hoffet dannar espalier gjennom salane i slottet, før dei sluttar seg til prosesjonen når båra har passert.

I den siste, vakre salen – Store festsal – er det adjutantstaben som overtek båra. Til slutt endar ho altså opp i Slottskapellet, der alle som ønskjer, kan få komme inn og ta eit siste farvel med den gamle kongen.

Minnestund for medarbeidarane

Kapellet blir opna for folk flest først i morgon, tysdag. I dag skal det haldast ei privat minnestund for kong Haralds familie, hoffet og adjutantstaben hans.

Når båra blir sett på ein fløyelskledd katafalk, er det kransane og blomsterhjarta til familien som omkransar henne. Kongekrona og rikssverdet blir plasserte oppå båra som eit siste symbol på at han no er borte. Deretter blir dei førte tilbake til Nidarosdomen og går vidare til neste monark. Kong Haralds ordenar blir lagde ved fotenden av båra.

(©NPK)