(NPK-NTB-AFP-TT): Sverigedemokraterna-leiar Jimmie Åkesson siktar på å bli statsminister i Sverige – men ikkje ved valet i år.

Det uttalte han til det franske nyheitsbyrået AFP onsdag.

– Det kjem fleire val, så eg har lyst til å sikte på statsministerposten i 2030 eller seinare. Vi er samde med Moderaterna om at Ulf Kristersson er den borgarlege statsministerkandidaten i valet i år, seier Åkesson.

Sverigedemokraterna (SD) har vore støtteparti for regjeringa til Kristersson dei siste fire åra, med stor innverknad på politikken. Om dei borgarlege vinn attval, ønskjer partiet seg tunge ministerpostar og stor innflyting etter valet 13. september.

Meiningsmålingane viser eit klart forsprang for partia som støttar Socialdemokraternas Magdalena Andersson som statsministerkandidat. Ifølgje pollofpolls.se får Socialdemokraterna, Miljöpartiet, Vänsterpartiet og Centerpartiet til saman 193 av 349 mandat i Riksdagen i gjennomsnitt.

Ulf Kristersson-blokka, beståande av regjeringspartia Moderaterna, Kristdemokraterna og Liberalerna og dessutan støttepartiet Sverigedemokraterna, får berre 156.

(©NPK)