– Det er gledeleg at prisveksten har minka, men han er framleis for høg, og det er for tidleg å fastslå at inflasjonsutsiktene fram i tid er vesentleg endra. Det kan derfor framleis bli nødvendig å heve renta, seier sentralbanksjef Ida Wolden Bache i ei pressemelding.
Det var brei semje blant analytikarar i ulike bankar og finansinstitusjonar om at Noregs Bank kom til å halde styringsrenta i ro under rentemøtet i dag.
Tonen vart sett då nye tal frå Statistisk sentralbyrå (SSB) måndag viste at prisveksten i juli ikkje steig så mykje som anslått. Bustadprisutviklinga i juli var også svakare enn venta. Begge desse faktorane talte for å halde igjen den venta renteauken.
Noregs Bank heldt renta uendra også ved førre rentemøte i juni, men varsla då at ho kom til å auke gjennom hausten. I mai vart ho sett opp til nivået ho ligg på no, etter to kutt i fjor sommar og haust.
Neste renteavgjerd kjem 24. september. Då publiserer Noregs Bank også ny pengepolitisk rapport, der dei anslår rentebana framover.
(©NPK)
0 kommentarer