(NPK-NTB): Frå juni i fjor til juni i år vart det 24.700 fleire jobbar, ein auke på 0,8 prosent. Jobbveksten har no vore omkring 1 prosent eller mindre i snart tre år.

– Jobbveksten på 0,8 prosent i andre kvartal 2026 er noko høgare enn den rekordlåge veksten på 0,5 prosent førre kvartal, seier Tonje Køber, seksjonssjef i Statistisk sentralbyrå (SSB).

Før pandemien låg den årlege jobbveksten mellom 1,5 og 2 prosent.

I andre kvartal var det i underkant av 3.167.000 jobbar her i landet.

Saman med akademiske-, høgskule- og militære yrke har sal og service stått for det meste av jobbveksten dei siste åra.

I den andre enden har det dei siste åra vorte færre jobbar innan kontor- og handverksyrke. Delar av jobbnedgangen blir forklart med den svake utviklinga innanfor bygg og anlegg i denne perioden.

Avtalt månadslønn var i juni på 58.970 kroner, ein auke på 3,9 prosent, som er den lågaste veksten på fleire år.

– Veksten i avtalt månadslønn held fram med å minke og var under 4 prosent for første gong sidan andre kvartal 2022, seier Køber.

(©NPK)