(NPK-NTB): – Legane seier at eg kan sjå fram til å bli heilt frisk, seier leiaren for Miljøpartiet Dei Grøne, Arild Hermstad, om kreftbehandlinga han går gjennom.

– Det har vore nokre tøffe veker med behandling etter at eg fekk leukemi. Eg har vore varsam med å gi oppdateringar for tidleg, men no er eg glad for å kunne dele gode nyheiter, skriv MDG-leiaren i ei oppdatering, som partiet har delt med NTB.

Hermstad håpar og trur at han kan vere tilbake på Stortinget om nokre månader.

Alvorleg diagnose

I midten av juni vart det kjent at Hermstad hadde fått leukemi og var under kreftbehandling.

– Diagnosen eg har fått er alvorleg, men eg har fått ein variant som kan kurerast med cellegift. Eg har vore gjennom to rundar med omfattande cellegiftbehandling, og desse hestekurane skal vere tilstrekkelege for å stanse produksjonen av kreftceller, skriv Hermstad no.

Han takkar dyktige legar og sjukepleiarar på Rikshospitalet, og kona Live, for å ha teke godt vare på han.

MDG-leiaren opplyser at han framleis er under behandling, men at det som står no att er mildare kurar og opptrening.

– Legane seier at eg kan sjå fram til å bli heilt frisk.

– Gler meg til å komme tilbake

Hermstad skriv at han og familien framleis ønskjer ro frå media og andre for å kunne fokusere på å bli frisk.

Han rettar også ein særleg takk til Ingrid Liland for innsatsen som fungerande leiar undervegs i sjukdomsperioden.

– Eg gler meg til å komme tilbake til dykk og vinne lokalvalet saman, seier han.

(©NPK)